倫敦 – 早前多份英國小報盛傳事頭婆可能會修例,供陛下主動提請,等威爾斯親王擔任攝政王。

但週日泰晤士報頭條報導,多個皇家消息人士,無論係白金漢宮同太子嘅清公府 Clarence House 嘅消息,都否認英女皇退休,提請攝政說法,表示事頭婆會以責任行頭、國家為先、做到死或者無行為能力為止。

消息人士紛紛要求記者同公眾,再次參考女皇係1947年嘅著名電台放送,當年佢宣示會終生為帝國同英聯邦服務,有關人士表示該宣示從未改變。

一名消息人士更加表示:「女皇向來強烈表示,除非佢病到無能為力,否則陛下只要健康,無論幾多歲,佢都唔會覺得需要攝政。其他王室成員直接承接更多任務就得了。」

而今年英女皇近年已經愈來愈少外訪,特別係跨洲嘅訪問行程幾乎已經全部委託威爾斯親王伉儷負責。

星期日泰晤士報

Comments

comment