維也納 – 除咗「一人晚餐」以外,奧地利公視 ORF 近年都係民情要求下,將一個之前大概聖誕新年期間嘅清談節目,變成除夕恆例節目。意念非常痴線,一個共和國電視台,公然俾一個人扮皇帝復辟,變成「除夕覲見」欄目。

呢個叫「朕即皇帝 Wir sind Kaiser」嘅節目,概念係 Robert Palfrader 扮演奧地利皇帝羅拔亨利一世復辟,接見各界人士,藉機諷刺政局,仲有各種演藝人士、名流嘅答問。

但好多恆定儀式係會令人心臟病發,例如皇帝出場,就真係唔可以用哈布斯堡首國歌 (即現德國國歌曲調),竟然就係用左膠至愛嘅「國際歌」,但歌詞卻係「我們終於有個皇帝,生活好到不再壞了」。(自然係針對有「紅色維也納」之稱左傾嘅首都嘅政壇。)


(以上有2014年Eurovision 冠軍 Conchita Wurst,2011年已經唱呢首「皇帝頌」。)

而節目話題同清談一樣,甚至有政客出現,現任副總理,HC Strache 都要上佢節目。

奧地利作為音樂大國,自然話題都好音樂,景點對話如下:

羅拔亨利一世:「威爾第啲歌劇劇情搞到好似睇報紙咁嘎,有無邊套開心啲,無死人?」
宮內大臣:「幾乎無啊,遊吟詩人,主角死,奧泰羅,主角死,茶花女主角死….(下刪三千字)……西西里晚禱,死成村,萊雅諾之戰,死成個戰場。」

最痴線嘅係,2008年奧地利國會舉行共和國90週年展覽,皇帝羅拔亨利一世甚至去踩場。

2017版甚至請黎國家歌劇院嘅女高音 Ildikó Raimondi 黎唱國歌。(限時收看一週)

ORF

Comments

comment