倫敦 – 首相文翠珊繼續係度玩脫歐平衡木,自內閣前留歐派同公務員開始唱過渡期甚至英國留係關稅同盟之後,如果有關主張落實,脫歐派據講有60人會造反。

最新甚至有脫歐派議員開始聯絡外相莊寶生 Boris Johnson,要求佢同意一個方案,若佢出馬選黨魁,佢擔任首相,高文浩為副首相,而相當出位守舊嘅後座議員李斯謨 Jacob Rees-Mogg 出任財相。

週日泰晤士報網頁截圖

有關脫歐派擔心,無君子協定嘅話,多達7名脫歐派混戰,會令盧綺婷等前留歐派漁人得利。

但莊寶生嘅盟友表示,無可能自己食曬,合理嘅情況應該同盧綺婷,授予其財相之位,以尋求更多黨內支持。

文翠珊方面則加緊監控多位大臣,擔心任何辭職會引爆內閣政治炸彈,導致48人向後座1922委員會交信,引發保守黨魁選舉。

而文翠珊嘅「脫歐戰時內閣」會係週三週四再開會討論同歐盟未來貿易協定立場作出決定,脫歐派表示若留係任何關稅同盟,將會有「騎兵殺到」,甚至傳出國際貿易大臣霍理林威脅辭職,阻止此事。

而脫歐派更加要求有大臣派駐比蘇士,監視公務員談判進度,前保守黨魁施志安被脫歐派點名出任呢個監軍職務。

星期日泰晤士報

Comments

comment