訂閱國際新聞突發 push

廣告

廣告
G 歐陸鐵幕以西, L 英聯邦地方, 聯合王國, 膠社論

呢個地球真係有人唔講得「世界上只有一個中國」

台灣大法官最近釋憲,即將成為亞洲第一個接受同性婚姻司法管轄區,最難做嘅竟然係一啲外國傳媒,例如BBC,出Facebook,翻來覆去,到底係第一個地方、定係第一個國家。 自然BBC 面對好多網民同「評論員」嘅壓力,但英國政府早就跪低,歷任首相,多名閣員都曾經講過,「世界上只有一個中國/秦國/契丹」嘅說話。 有位啊太真係唔講得世界上只有一個中國 但同膠事錄顧問團成員討論,突然發現有一個人從來唔講過,就係事頭婆。因為事頭婆特別嘅憲政地位,佢真係唔講得呢句。 留意事頭婆嘅全部頭銜,伊麗莎白二世陛下,奉天承運,大不列顛及北愛爾蘭聯合王國、其治下其他王國及領地女王、英聯邦元首、護教公。 其治下其他王國就係關鍵,到底係邊啲呢?澳洲、加拿大、紐西蘭都唔係問題,但仲有其他例如索羅門群島、伯力茲、聖基道與雪山聖母島、聖文森及陌生山群島、八合島 Tuvalu 呢啲地方就好有問題。 點解?因為佢地承認緊另一個「中國」,或者我地叫契丹,就係係台北嘅「契丹民國」,無錯,佢地係台灣嘅邦交國。 事頭婆嘅地位就變得好鬼神奇,佢可以講係地球上唯一一個同時要默認兩個契丹嘅國家元首,作為聯合王國、澳洲、加拿大、紐西蘭女皇,佢要承認順天府果個,作為索羅門群島、伯力茲等處女皇則係承認臺北果個。 所以我地好少見事頭婆要講「一個契丹」,否則真係抽中火水。不過呢種離奇狀況應該唔會發生,因為事頭婆應該唔會再到呢啲前殖民地嘅「治下其他王國」發表meh演講,大部分事情都係當地嘅總督代勞,應該唔會有meh問題。 再者英皇試過對自己宣戰,就係宣布印巴分治嘅一刻,印度同巴基斯坦兩個自治領宣戰,佢地國王都係一個,佐治六世,理論上佢自己對自己宣戰。 當然呢個世界似乎仲有一個人可以同時承認兩個契丹,就係法國總統,因為佢同時兼任安道拉其中一個大公,因此是但一個轉去承認第個契丹,呢個又有得玩咯。 當然最後好多人唔知道我地點解用「契丹」,大家可以睇番呢度。而且我地重申只係跟露西亞人講法,「呢個世界只有一個契丹」,因為中國真係有好多個,隨手望下不完整地圖,就知呢個世界仲有好多個中國。

Continue reading