倫敦 – 文翠珊最近搞到唔少英國記者開始煩躁,特別佢滴水不漏嘅回答問題,所謂 soundbite 全部都係設計好嘅選舉口號,搞到大家都好無癮。唔少記者表示佢好似機械人,或者係「唔回答問題嘅大師」。

甚至英國專門寫政治諷刺短打 Sketch 嘅寫手,都開始針對呢個問題寫post,表示全天下最慘嘅,莫過於文翠珊嘅老公,Philip May。

每日郵報嘅短打寫道:文生問文太:「翠珊BB,想要茶嘛?」

「我要非常清楚表示,係呢個保守黨政府嘅強勢穩定嘅領導下,全國各地數以百萬計嘅打工仔女先可以坐低飲杯安樂茶。我要佢地繼續可以飲安樂茶。因此,佢地唔可以將自己嘅安樂茶交俾高志民嘅混亂連線嘅手上倒瀉曬。」

「梗係啦,BB。但妳想唔想要杯茶啊?」

「我已經講得好清楚,一杯茶,對於全國上下數以百萬計嘅普通打工仔女非常重要。係呢場選舉,選擇非常明確:投我一票,保住杯強勢穩定嘅茶;投高志民同佢嘅混亂陣線,腳損杯滅,砂糖滿地。」

「妳啱曬啊,打令。但我剩係問妳要唔要杯茶,我繼續熱住啲水先?」

「我已經好清楚答你,但我要絕對清晰,我重複:呢個國家嘅人,要知道佢地杯茶係唔係安全。我好清楚,只有投我一票,先可以保住杯強勢穩定嘅茶,坐低食塊好餅。 高志民嘅領導無方同佢嘅混亂聯盟管理呢個國家嘎話,大家唔單只無餅、坐都無得坐,甚至有真實危機連奶都無。我認為我地要講清楚,呢單嘢好重要。」

每日電訊報