專訪前進運動香港分部 (一)
Emmanuel Macron 馬康呢個名，一年前甚至法國人都無乜人聽過。但從去年8月辭職參選法蘭西共和國總統，從未競選公職，且年僅39歲嘅佢，竟然民意調查穩佔第二，法國歷史上從所未見。 而佢為參選創立嘅「前進 En Marche!」運動，更係現時法國基層最活躍嘅「參與型民主」政治組織，甚至遠至香港都有分會。難怪英國前外相文禮彬早前更係「泰晤士報」專訪時表示，馬康「成就一個非凡嘅(政治運動) He’s built something extraordinary」。
馬康過往幾年俾法國人嘅印象，可謂係「政治金童」。曾經係羅富齊銀行嘅 iBanker，2012年出任總統府副秘書長，協助社會黨籍總統荷蘭施政。2014年獲任命為華曼努二次內閣經濟產業及數碼科技相，當時年僅36歲。而私人生活方面，都係人生勝利組。不少報導指出，佢年僅30幾歲，但已經有7名孫輩。但事情唔係咁簡單，馬康太太 Brigitte Trogneux 比馬康年長24歲，而且係佢中學年代嘅法文老師，而子女孫輩都是馬康太太同前夫所生。
但法國人喺政治選擇之時，向來當政客私生活係透明，總統無情婦如同火星撞地球般嘅突發新聞。但對於早前接受龜雲膠磚訪嘅「前進 」運動香港分部負責人 Sandrine Virginie Hilaire，以及委員會成員 Helene 和 Vicent 而言，雖然都不太想議論政客私生活，特別係「煲老藕」嘅部分，令佢地覺得馬康呢個人很有穿透力，真係能夠調和不同族群，令佢地互相對話。
哲撚一名
當然三人對馬康嘅印象相當正面，例如非常聰明，有活力，Vincent 甚至笑稱佢法國版嘅杜澤天 Justine Trudeau。但相比起呢啲特質，馬康嘅學術經歷更加重要。「除咗巴黎政治學院 Science Po、國家行政學院 ENA，馬康仲有個哲學學位，而且師從著名法國哲學家 Paul Ricœur，咁學術嘅背景係法國政治很少見，而且係佢政綱同行事都同舊政治非常不同。」Sandrine 表示。馬康嘅「前進」運動的確和法國過往中央集權傳統很不同。「前進」運動網站早期已經非常積極，一登入已經要用戶留下社交媒體帳戶資料，龜雲膠磚訪組也是因此開始同「前進」運動接觸。
而馬康呢個參與型民主政團，在法國嘅冒起也係相當神奇。「前進」運動自2016年4月成立，到現在已經宣稱有21萬名義工，係全球3747個委員會出謀獻策，舉辦活動。而「En Marche!」這個法文字也可圈可點，有「前進」嘅意思外，仲與「係街邊」、「步行」等意思，EM兩個頭文字，更巧係 Emmanuel Macron 嘅縮寫，比起法國傳統政黨名來講，相當在地。
而更加前所未見係「前進」運動嘅崛起速度，今年2月係里昂嘅集會，已經聲稱有16000人參與，已經去到各大黨嘅水平。而係來緊總統大選以後嘅國會選舉，557席次，「前進」運動都有信心可以有代表參選。
左右逢源
「『前進』運動，並無定義自己係左定右，只要大家係『進步』嘅政客，甚至可能帶著以前嘅黨籍參選，加上前進運動嘅黨名，或者只係用前進運動嘅黨名。」Sandrine 表示。而佢講述呢個不左不右，正是「前進」運動特色同異數，不屬於法國任何傳統陣型，但支持似乎比較浮動，當左派弱時，得票會左傾一啲，右派弱嘅時候，則右傾。
就算係狹縫中生存，馬康民調一直有過 20%支持，維持排名第二，如果第一輪投票如民調所料，佢能夠進入二輪投票，進而有機會過半成為總統。
但法國係半總統制，總統選舉過後嘅國會選舉，若「前進」運動和聯盟議員過半，才能拿到組閣權。但這已經係法國從來未見過嘅畫面，如何組成執政聯盟，或者傳統講法嘅「左右共治」嘅同居狀態 Co-habitation，暫時得個估字。
凱恩斯？貝理雅？
然而，即使馬康能夠入主天堂宮，佢接手嘅法國經濟都係一盤爛攤子：2008年嘅金融危機係自大蕭條以黎西方世界最嚴重嘅經濟危機，其後2011至2012年嘅歐債危機幾乎令法國經濟陷入第二次衰退。但係即使法國能夠避免第二次衰退，法國過去幾年嘅失業率持續高企：舊年年底法國嘅失業率仍然大約企係10%，青年失業率更高過20%。
對於呢個局面，Sandrine表示馬康嘅經濟政策同果要係凱恩斯主義同新自由主義之間擺位嘅話，會係傾向凱恩斯主義。但係目前嘅經濟情況下，馬康提出嘅經濟政策包括削減六百億歐元嘅公共開支、裁減十二萬公務員、降低利得稅率、改革勞工法例提高彈性，但同時打算容許自僱人士等領取社會福利、加強教育方面投資等等。Sandrine表示，馬康唔係果啲只係睇住「底線數字」(即係政府盈餘或者赤字)黎做野嘅人，而呢啲改革亦遠比另一個主要候選人黎得溫和務實。
但身為當日其中一個訪問者嘅龜雲膠磚訪組指出，考慮到馬康面對嘅局面、同埋改革嘅規模，如果話馬康要係左翼內部做一次戴卓爾式嘅改革。Sandrine表示唔同意，因為馬康唔係戴卓爾，亦唔會使用鐵娘子嘅強硬手段，佢比較傾向將馬康嘅經濟政策同貝理雅對比。龜雲膠磚訪組當時補充一點，就係貝理雅嘅改革係係經濟擴張周期下嘅財政擴張政策；而馬康好大機會要係經濟停滯周期下進行財政收縮政策，馬康未必想做戴卓爾，但佢嘅工作難度卻可以同戴卓爾相提並論。
Make Europe Great Again
講到呢度，龜雲膠磚訪組針對歐元區情況亦問Sandrine點睇歐洲內部嘅貿易不平衡，當中德國取得不少順差，變相令歐元區其他國家變得更窮。Sandrine表示，唔能夠只係睇住貿易順差嘅數字，因為過去幾十年，因為歷史嘅原因，法國、意大利等用左更多嘅資源係軍備上，以保護歐洲。因此馬康如果上台，佢會同德國協商要建立歐元區統一財政以及要德國對歐元區進行投資，帶動返歐元區其他國家嘅經濟，咁樣歐洲先真係能夠克服困難。最後，亦少不免提到Donald Trump同全球化退潮，Sandrine即時反應表示法國唔係實行Trump嘅貿易保護主義，但係法國係一個歐洲國家，法國會實行一個會保護自己企業嘅政策。
而係另一方面，馬康對習慣上中央集權嘅法國，提出更深遠改革，就係將一啲社區開支，下放到府或者市鎮社會決定，而不是右翼嘅私有化，亦唔係左翼嘅中央計畫。呢種新做法，也即係參與民主，令很多法國人，甚至海外法國人，都參與這個運動。Vincent 更表示，「係法國政治上，呢個係難得嘅集會，我地要抓緊機會發聲。」而Sandrine則認為呢個顯示咗馬康嘅哲學背景，「你要得到權利，就要有相當嘅責任，呢個係同傳統法國政治好唔同嘅approach。」
走在前線嘅香港分部
然而香港嘅前進運動，在法國本部成立嘅翌日就有委員會成立，12月底已經有60多人，現時已經200多人，舉行多次活動。而香港分部更不乏社會名流，例如法國五月藝術節總監賈奕楠 Julien-Loïc Garin 都係委員會召集人之一。
而香港分部已經組織過多次聚會，而且就法國政府對海外居民政策同態度有頗多意見，呢個就係應該點解，法國本部成立嘅翌日，香港分部就已經成立。到底佢地有咩怨言，同點解香港會成為法國選舉兵家必爭之地，且聽下回分解。
龜雲膠磚訪組
喺香港，你身邊其實有好多國際新聞發生緊，抄報click farm唔做，唯有陸龜、Econ 記者、寰雨膠事錄、延文禮士待訪錄為你逐個捉，捉個訪。
