專訪前進運動香港分部 (二)
上回提到，香港嘅前進運動，在法國本部成立嘅翌日就有委員會成立。磚訪組發現情況十分有趣，因為需求是雙向，香港未必算做傳統意義上嘅票倉，但旅居香港嘅法國人可以話係高密度。而另一方面，特別係隨著旅港法人並非再個個大富大貴，佢地願意參與政治進程嘅決心，比過往為高。
香港其實算係汪洋大海嘅海外選區一個 Easy-get 票倉
磚訪組很早就開始接觸前進運動，佢地香港委員會成立以後，已經組織多次聚會，討論各項政策。而佢地係香港主要對手，共和黨嘅菲永陣營，都有少量活動。然而更離奇嘅係兩個陣營，將會係4月6號，係浸會大學舉行一場辯論，甚至係用英文進行，由共和黨係香港負責人 Antoine Freches，大戰前進運動嘅香港負責人 Sandrine Virginie Hilaire。
但係點解會係香港咁高調搞活動？Sadrine 表示，咁係因為香港近年嘅法國人越黎越多。法國駐港領事館回應龜雲膠磚訪嘅查詢時表示，佢地正整理最新的資料，但據佢地紀錄2012年的時候，就已經有超過一萬個法國人登記在港居住，佢地估計宜家香港嘅數字約莫二萬五千個法國人。Helene 嘅估計就更加緊要，佢地估計高達五萬個法國人係香港居住。呢個人口數字，係法國超過四萬個社區(commune)而言，排130（當中有40個位於小法國道île de France入面）。
如是者，雖然經驗上海外法國人投票率較低，但以今次法國大選首輪有五個主要候選人嘅情況睇黎，一兩萬票係有機會影響首輪投票嘅名次。本來法國嘅兩輪投票制就相當不利左右兩翼嘅政黨，倘若勒龐無法係首輪投票中取得最高得票的話，咁樣勒龐係聲勢上遭遇挫敗。
另外，香港屬於國民議會第十一個海外席位（亞洲、露西亞及大洋洲），但考慮到幅員廣闊而上屆總選民人數先得十二萬人左右。不論過去五年在港嘅法國人口係倍增還是四倍增，香港都將會係呢一席國民議會嘅主要戰場。
法國國民議會海外僑選第11選區範圍 (來源：維基百科)
海外法人不再富貴 打本地約工都 要供強積金
但政黨有動機搶飛，但唔見得在港法人要和應，根據海外法國人網報嘅記載，上次2012年大選，共和黨嘅前身「人民運動聯盟 UMP」都曾係香港舉行選舉活動，但未見在港法國人有今次咁積極。
當然前進運動嘅新模式，令不少法國人見到新希望，唔再係兩大黨同商界壟斷，小市民無聲出，正如我地上篇提到在港 Vincent 表示要捉緊表達意見嘅機會。對於 Vincent、Sandrine 同 Helene 而言，法國政府對佢地最唔公道嘅係一直當佢地係 Expat 海外特派，甚至有意無意暗示佢地逃稅。
(法國人甚至自己發起清潔香港海灘嘅行動，親近運動都有組團參與。)
Sandrine 表示現時法國人係海外，例如香港，同過往嘅「海外特派」好唔同。海外特派，基本上係維持係法國嘅勞工福利，例如工作時數、勞工保險、家庭福利等等，只是工作地點係香港而已。Helene 更表示這類係香港嘅工作愈來愈少，法國巴黎銀行 BNP 據講數年前仲有7個類似職位，到近年只有2個。Helene表示，隨著早前契丹經濟看漲，不少法國公司都將區域總部搬左去上海，係香港嘅「海外特派」職位愈來愈少。
但法國領事館俾我地嘅數字卻是不減反增，愈來愈多法國在港打工，上文提及Helene嘅估計就更令人驚訝。Sadrine 表示愈來愈多嘅法國人來港係打藍領工，甚至係餐廳嘅侍應工作，完全按照本地勞工法例，不再是待遇優渥嘅「海外特派」，而係本地合約嘅「經濟移民」。Sandrine 表示自己雖然係法律顧問，但自己卻係用香港勞工法例獲聘，要俾強積金。甚至佢笑言自己有如菲傭，都要定期寄錢返法國，養活在法國嘅子女。
香港愈來愈多「經濟移民」，本身同法國經濟差有很多關係，上文提到接近10年衰退。其中 Helene 係再次返來香港搵工，曾經係記者嘅佢，因為自己年老，想返法國搵食，但4年都無法搵到工，最後都要返香港教法文。
只不過，點解會係香港唔係其他地方？考慮近年歐洲經濟不濟、美國復甦不太久、即只剩低亞太地區。而亞太地區中能夠搵到一份合適嘅人工嘅地方，則只剩香港、星加坡、南韓、日本或者上海。只不過以人工而言，香港普遍優於南韓上海，而星加坡作為fine country對法國人而言興趣亦有限，在港法國人急增似乎係情理之中。
而香港嘅本地合約，明顯比法國嘅勞工待遇差，然而再面對政府指責，或者「罔顧事實」，自然令不少在港法國人，希望通過「前進運動」發聲，希望改善自己嘅待遇。來緊嘅在港法國人辯論，代表商界嘅共和黨同呢股新進力量會有意見甚麼雷同，又甚麼對立政見，龜雲膠磚訪組有時間嘎話，會再同大家跟進下。
龜雲膠磚訪組
喺香港，你身邊其實有好多國際新聞發生緊，抄報click farm唔做，唯有陸龜、Econ 記者、寰雨膠事錄、延文禮士待訪錄為你逐個捉，捉個訪。
(標題圖片：旺角康樂餐廳愈來愈多鬼佬聚集)
相關活動
EU+ Series: Europe – A Year of Fateful Elections?] Seminar #2 “French Presidential Elections: Towards a New Europe in Two Voting Rounds?”
Date: 06/04/2017
Time: 5:30 pm – 7:15 pm
Location: AAB303, Academic and Administration Building, Hong Kong Baptist University
Event Website: http://euap.hkbu.edu.hk/main/events/elections2017-french/
