英女皇媽媽大家就耳熟能詳，但另一位「皇太后」，菲臘親王嘅母親，巴登堡郡主雅麗絲卻唔係好多人聽過，但佢嘅生活卻比皇太后更多姿多彩。
數年前由英國電視台為佢拍攝紀錄片，紀錄佢從維多利亞女皇宮廷出生嘅公主，到認識希臘王子，到嫁俾佢，巴爾幹半島試過上戰場救傷兵。
但佢後來被發現有宗教幻覺，係希臘王室被迫流亡後，佢被放逐到瑞士嘅精神病院。
後來經過離奇治療之後，出到院，返到王室當政嘅希臘。實際上係德國王室後裔嘅佢，竟然留低照顧希臘，納粹當局吹佢唔漲之餘，佢仲庇護咗之前為王室服務嘅猶太人。
佢甚至係戰後創立修會，雖然唔太成功，但係雅典留下善名，甚至希臘再度變為共和國都唔肯走。
最後係菲臘親王指示英軍將佢撤出，先至多年以後同兒子團聚。甚至佢出席新抱登基大典時，都一身尼姑服飾出席。
但佢死後依然為世人帶來驚喜不斷，因為佢對東正教嘅虔誠，要葬係東耶路撒冷嘅橄欖山教堂，但當地係被多國認為係以色列佔領嘅巴勒斯坦領土，包括英國政府都咁認為。最後係多方同意下，雅麗絲獲准葬係當地。
菲臘親王同查爾斯王子都因此「被迫」訪問呢塊以色列佔領地，以便可以謁陵。而相信以色列因為郡主曾經救過猶太人，獲贈「國際義人」稱號，程序都簡化唔少。
